Mirant òt: doménica indrè a t’ äva stusighè e subìt a ’t m’é fat do parädi strepitózi ! Béla risposta, trancuill e sicur avanti acsì;

Zenón séz: partìda äd sacrifìssi jerdlà lilór i gnävon zò in socuant e tutt nojóz, po’ cuand a sämma restè in déz a ’t tocäva anca scurtär a metè camp, ma cme sémpor ‘na garansia;

Zacärd òt: centräl, lateräl, a metè camp, indò t’ al mètt al zuga ! S’ a sarvìss l’andrìss anca in porta ! Ancòrra ‘na volta al pu bon in camp;

Lucaréli séz: mo che ràza dì, al prìmm témp a ’n t’é fat che brangognär con tutt, guardalinee arbitro avarsäri, péz che ‘na suocera, però in ripréza a livél atlétic,h a gh’ vräva poch dopa ch’ a t’j é buscädi in velocitè da tò fradél;

Paci ot: béla partida con di atacant pù bas äd vint bòr con ch’ il do gambi longhi lì a ‘t rizgäv äd tribulär invéci t’è fat ‘na partida strepitóza, ätor sént äd ch’ il partìdi chi;

Castlén séz: stéss discors äd Dino, a gh’ariss piazér ch’ a ’t podìss sgnär un gol parchè secónd mi a ’t gh’è un péz in-t-la tésta dopa l’autogol ch’ a t’ al sè ti e basta ! Al tir al vol da ridolini dal secónd témp l’é ‘na dimostrasjón ! Dai Pavlén forsa e corag’ tén dur;

Galloppa dù: dailà da n’armìssa col man té ’t si fat ciapär in méza cme ‘n giovedì. A n’é ’s pól miga fär dil cojonädi compagni ! Lòmo l’é ora äd fär ‘na flébo äd cafè parchè l’é un perìod ch’ a ‘s dorma e miga poch;

Dzemaili sét: manca poch poch, manca luciditè e anca ésor pù decizìv la davanti, p’r al rést a gh’ sämma bombén, bél zugadór dabón … ;

Morón sèt: dil volti a ’s vädda ch’ l’é pròprja stuff però al n’é mòla miga, al còrra indrè ch’ a pära ch’ al daga zò da un momént a ch’ l’ ätor però al n’é mola mäi !;

Biabiany sìncov: eh dai l’é un vót parchè a né ’t tir mäi in porta miga ‘na volta che vùnna oh ! Magna un po’ äd pan e volpa che p’r al rést la va bén;

Amoruso cuator: al conträri che col Bològgna, al rigor zbaljè al t’ à tajè il gambi cme un maràs, domenica NO ! Capita … tant a ‘t si talmént pràtich che béle domenica a ’t n’ in farè vünna strepitóza;

Guidolin sìncov: méj dal zéro äd doménica pasäda mo anca jerdlà so cuant còzi un po’ da discuttor, però a ’n vój gnànca enträr trop in-t-i discors técnich, però ‘na dmanda la vój far : e Bojinov ?;

Leonärdi déz: gran béla préza äd pozisjón con la Juve par la facénda äd Lansafàm ! Complimént e avanti acsì, un dirigént con i barbìz dabón e di ch’ impäron chi prepotént là !