|
 Mirànt
déz: al vót al
sarà déz par tutt, un prémi a chi ragas chi ch’is fan sognär dabón ! Ma p’r
al rést al sät ch’ a né ’t pär né un portér né un napolitàn, trancuìll
silensjóz, pròprja al conträri dailà dam la manéra äd dir ‘na cuälca
stupidäda anca par ti no ?;
Zacärd déz:
crescendo Rossiniano i
dirìsson a Pärma Lirica ( in do jèmma fat al brinidisi äd Nadäl prìmma ädla
partìda ) second témp incontenìbbil e ala fén assist decizìv e gran gioia
sòtta la curva ! Che gran acuìsst chilù ! Bravo caplón e bravo Don !;
Paci déz:
un león, tra Di Vaio e ch’l’ätor in l’àn mäj vìssta, di vè di la vritè che
vèddor legrottaglie in nasjonäla a’t brùza bombén, mo la tò nasjonäla la
zuga al Tardini di ch’is ràngion chi bagolón là;
Lucaréli déz:
gran béla partìda anca par tì, difensór con maruga e pè bón, còssta chi l’é
‘na scuädra ch’la tàca a zugär äd cualitä da la diféza e a ’s vädda;
Panucci déz:
còssti chi cära al me Christian j’én gol “preziosi” ! Ah ? ti co dit ? La
risposta äd n’òm e d’un campión a un pajàs ! Anca nojätor sèmma orgoljóz ch’
at zugh con la crozäda adòs, sicur !;
Castlén déz:
Pavlén mi a còj ch’at critica a digh ch’ a’t fè pù sträda ti che un
camionìssta, donca d’ogni tant a gh’ sta l’erór, ma anca jerdlà a sinch
minud da la fén, ‘na zugäda äd cualitè par där al la al gol ! Bravo
bravìssim;
Lansafam déz:
a’t jè bén bén strachè tut al prim témp chi bolgnéz li, po’ a gh’ à pensè
Nick a därogh al cianuro in fónda ! Zógh äd scuädra parfét;
Amorùz déz:
fantastich Nick, dopa avér zbaljè un rigor catär al caràtor par continuär a
zugär e fär gòl a vól dir ésor profesjonìssta e in gran forma, fìzica e
mentäla ! Complimént dabón !;
Morón déz:
a’t s’ér gnànca contént Stefano no no gnànca un po’ ! Dapartùtt, garansìa äd
corsa cuantitè mo anca cualitè, al fil ch’a tén insèmma un centorcàmp da
lecär’s i barbìz;
 Galloppa
déz: valà che
zugadór imperjäl chilù ! In sèrti zugädi a’m ricorda Boghossian, con la
difarénsa che col là al zugäva sìnch partìdi l’an’, chilù invéci a’n n’in
sälta miga vùnna! Bravo a lu e bravìssim a chi l’à fat gnir insà;
Dzemaili déz:
che stranòm a gh’ catämma a chilù, no parchè con col nòm chi a’s fa fadiga a
tirärogh fòra anca do stupidädi, in carsùda verticäla anca col ragas chi,
l’é madur anca p’r un gol ormäi;
Biabiany déz:
da centravanti al né väl njénta, al secónd témp spostè a déstra invéci l’à
cambiè par prim la partìda ! Un cicolatén sémpor pù indigést p’r j’avarsäri
però !;
Guidolin déz:
Don co dir ancòrra
? Che al Circolo la Quercia e Leoni a
Barbjàn j’én béle drè a tirär
fòra il tävli e il scràni par fär fésta !;
Ghìro e Leonärdi
déz: par la
gestjón dal cäz Panucci, e par la gestjón äd la Socetè ! Bravìssim, e al
Ghìro al sa che mi di complimént a màca a n’in fagh mìga, mo adésa ogni mòsa
ch’ a fì l’é ‘na mòsa da socetè séria, solida, unìda e con gli attributi (
a’s dirìss in-t n’ ätra manéra );
Sandro Melli déz:
auguri Sandrone,
benvenuto in-t-al club degli anta, un déz par ‘na vìtta da Bandéra Crozäda e
p’r il tanti sodisfasjón ch’ a t’è regalè a tutt cuant nojätor;
Pùbblich déz:
un déz dedichè al
pù bél strisjón dal mond tirè fóra in-t-la pù bela curva dal pù bél stadio
dal mond: CRUSADER ULTRAS SUPPORTERS, che i Boys j’ àn tirè fóra cme regäl
äd Nadäl par tùtt còj che dardè a col strisjón lì i gh’ àn pasè sentonär äd
fésti ! Mi son sincér a ’m son comòs dabón e vù ? Ah a propozit, Ròmma sòtta
Nadäl l’é belìssima, e färogh ‘na gita in socuànt ?
Crociato
+63+ |
