Pavarèn òt: stagiòn da yoyò, andäda da sgrizòr, un ritòron pù che discrèt Torero Camomillo, a pära ca t’abi soportè al mäl äd schïna tut al giron d’andäda in silensi sensa sarcär scùzi, insomma na parsòn’na par bèn e un bòn profesjonissta !;

Pegolo sèt: una partìda o du a ne’m ricordi gnanca, a Vicensa sicur, na bèla prestasjòn e tut’al rest ed stagjòn tra infermeria e banchèn’na;

Antonèli òt: pochi pochi partìdi, suficienti però pr’èssor godù da tùtt, na sicurèza in panca, miga un lavòr da tùtt;

Castlèn òt: Pavlèn, sa t’ho da dir la vritè i dù ca’t gòda äd pù a Pärma a sämma mi e Paolo Grossi, d’ätra pärta à sämma anca i dù ca n’in capìssa äd pù äd balòn dònca a’t pòl stär sicur, e adèsa, tajèr chi cavjì lì ca sämma tornè in A se Dio vòl;

Falcò sènsa vòt: stagiòn triboläda, prima Cagni, dòpa gl’infortùni, insòma tùt stort, girämma pagina a la zveltèn’na;

Lucarèli picèn òt: gran zugadòr, pilaster, caratòr, pè bòn, parsonalitè, cuand l’è manchè lì in mèsa i balävon c’me a l’Escalièr ! A’t confermi mi, par st’an c’ven, pasa dal Ghiro a firmär al contrat cl’è bèle pront;

Paci sèt: ält e bas, par fortòn’na pù j’ält che i bas, cl’embolo lì ca partìssa un po’ tròpp de spèss, na cuälca partìda un po’ acsì, mo tutt somè na stagjòn pozitìva, specialment con Lucarèli a tàca;

Ròssi sinc: l’è un vòt par zveljart’un po’ parchè a te’t si drè a indormintèr un po’ tròp, e a la tò etè la’n va miga bèn ! Forza pramzàn;

Toast sèt: un sèt ca pòl dvintär un òt o un nòv s’at starè chi a Pärma e mi a spèr äd si, e anca il ragàzi äd Pärma a’s dìs in gir;

Zenòn nòv: Dino second mi la pù bèla sorpresa äd l’an n’ätor zugadòr da l’an pasè ! T’arè sbaljè na partìda si e no, na sicurèssa ! Vojätor d’la Gazèta ca conosìv tùtt, provì a recuperär Dino l’originäl e a’l portì a Colècc e’g fì fär na bèla foto insèmol dai;

Budel sèz: DePiscopo s’era ispirè a tì cuand l’ha scrìtt andamento lento, d’il voltì propria da impajäros, però dù gol fondamentäl e n’esultansa da nador;

Lunardè òt: sensa strafär  a’l s’è ricavè al so spazi subìt, e cuand l’ha zughè l’ha sempär fat la so pärta con umiltè, un ragas sèri che a Pärma al sarà sempär rispetè;

Manzò sèt: un gol pesantìsim a Frosinò e sforton’na pauròza, al prèmio Swarowasky 2009 l’è tòvv sensa dùbi;

Mariga nòv:  esplòz äd prepotènsa, con tùtt il cualitä da gran zugadòr ! Corsa, potènsa, cativèria, tecnica e maruga … pù maruga per Mariga in pochi paròli;

Moròn òt: dèz par vlontè e atacament, sèz c’me rendiment st’an, giron d’andäda oribil ritòron molt mèj, ma fàscia da capitàn ereditäda e sempär onoräda, e i tò lagormòn d’al dezdòt äd màg adèsa i s’en trasformè in lagormòn äd contintèssa, esatament c’me i nòstor!;

Leon sèz: gèni e sregolatèza ! A dir la vritè pù sregolè che geniäl ma la prestazjòn col Pisa la väl cuäzi na stagiòn da lè ! T’è catè finalment i’l ciävi par revär al luchètt d’la porta ädla serie A;

Lucarèli sèt: Cristiàn, par còl ca t’è fat in camp al sèz l’è stirasè, pr’il sclerädi anca, invèci te’m si piazù bombè c’me ategiament in t’al finäl a där na man al mister, fondamentäl dabò al vòt l’è par col lì ! e po’, al gol col Pisa … second mi t’arìss paghè äd tò sacòsa si’t l’avìsson dit ca t’al fäv acsì;

Paloschi dèz: la pù bèla sorpresa äd l’an, un ragasèn strepitòz, in camp e fòra ! A’g vrìss propria na ramäda par tì e sta sicur che temp do partìdi e’t la tirarìss zò c’me Barbuti! Grazie e resta chi ca’t stè da Dio !

Pisanu sèz: al temp äd fär dù gol, e la solita Via Crucis ! Na benedisjòn Andrea ?;

Vantagè sèz: Bulgaro, colp da fuoriclàsa, ma rendiment apèn’na suficent par col ca’t si costè, ma la tò categoria la sarà la serie A, dopa al taljand ai znòcc;

Cagni zero: lasèma perdor;

Guidolin dèz: Don, t’è capì tùtt fin dal prinsìpi, a gh’è coj ca dìz ca ne’t rid mäj, ca ne’t si miga spiritòz, dàg gnanca a menta, sa vòj ridòr a guärdi Zelig, ti t’è fat al tò mestèr da gran professionista, e prim’äd tùtt t’è capì i pramzàn al vòl ! Mì spèr che col matrimòni chi al pòsa durär al pù posibil, e c’me mi tùta la gènta äd Pärma ! Grazie Mister, grazie äd còr !;

Ghirardi òt: vèdot Ghiro che cuand’a n’è ora al bèl vot al riva? Basta meritärol; anca tì da cuand’a gh’è al Don a’t si madurì äd colp, adèsa t’al sé col ca vrämma tùtt a Pärma, e’t vedrè che la genta la’t vrà ancor pù ben ! Avanti Ghiro!;

Tifòz dèz: un bel bagn d’umiltè anca par nojätor, e dzämma ca’s sämma divertì parècc, pù bel in trasferta che in cà, con la colon’na sonora d’Antonio Benassi, bèj c’me al sòl! Pärma l’ha rispost c’me sempär, a testa altìsima e adèsa väla par tùtt, zò al man dal Tardini, stì a la lärga dal monument, capì ?

Crociato +63

Le pagelle 2008/2009