Pavarèn sèz: un pòrtèr c’al ne ciàpa gnanca un gòl l’è par fòrsa suficènt, mò ded chi inànz a’l ciamarò Valium parchè a’l pära sempr’imbambolè;

Zenòn òt: Dino se Dio vòl a’t c’minsämma a vèdor da razòn! In cò vòn di pù bräv sia davanti che dardè, e anca un assist anca s’al paräva pù un tir svirgolè mo la va bèn acsì;

Castlèn sèt: l’è drè a fnìr al rodàg d’al motòr retifichè, sempär mèj da cuand l’è rivè Guidolin o sarà mèj dìr da cuand lè andè Cagni;

Rossi sèt: Marchètt l’era ora, na partìda còj barbìz, grènta determinasiòn voja äd tornär a la zvelta in do gh’èma da stär!;           

Paci sèz: un po’ mèj che j’ultmi fèsti, a momenti a’t fè anca gol, a po’ tutà c’la contentèza la mìè piasùda bombè, però fat prestèr un po’ äd Valium da pavarèn che ti a’t sarissa da bòn;

Lucarèli picèn sèt: a pärta n’eror da infärt, second mi la pu bèla partida con la maja d’al Pärma, l’è evidentisim cl’è drè a crèssor e miga pòc;

Moròn dèz: adèsa à te t’sì mìss anca a fär al portèr, a’l sèt on o no che c’la paräda li la väla òr? A’t gh’è butè l’ànma e anca un po’ äd pù in camp, un esempi da seguir con ch’il do gamben’ni c’at pär ciucè c’me la tiramòla;

Budel sèt: l’è drè a ciapär sempär pù confidenza, lameno dzämma che adèsa a’l g’ha gl’idei ciäri speräma c’al continua;

Leon òt: fin’al moment äd col strepitòz recuper l’èra decizament sòta la media, mò col recupero lì l’è stè c’me sgnär un gol ansi l’è stè c’me färni dù parchè su l’asiòn dòpa a’l gol l’èma fat dabòn nojätor;

Lucarèli sèz: Cristiano cò vòt dìr, che l’impègn a’l gh’è stè tùtt, un po’ äd sfortòn’na et’si restè a bòca sùtta, dai sara par la prosima fèsta;

Reginäld tri: bisogna ca pärla con la Gazèta parchè ormäj catär cuèl da dir su chilù l’è un sfors miga da ridor, a vòj n’aument äd la tarìfa pr’al sfòrs! A’l prototipo d’al gnenta!;

Papò dèz: na ventäd ad gioventù, äd velocitè, äd fantasia, sa vrämma anca d’incosciensa d’i vint’an, al fat l’è clè gnu su e l’ha decìz la partìda! Un gol miga trop dificil mo par cazärla dentär bisogna ìssor lì!;

Guidolin òt: a’n so miga s’al g’ha la batèca magica, al fat l’è che da cuand a gh’è lù la scuädra partìda dopa partìda la crèssa, la còra äd pù, l’è misa bèn in camp, l’è pù sicura ! pr’adèsa chèra a’l me Don Francesco andèma ben bombè;

Tifòz sensa vòt: al vòt a’l darò dopa Sàbot cuel a Mantva, parchè a gh’èma da fèr n’invasiò, pochi bàli ragas, adèsa dopa avèr lèt il pagèli, andì a la Crozèta o all’Euro Torri e andì a comprär i bigliètt par Mantva! A podì partir in t’uil do ori e a sèt ori a sì a cà, a’n gh’è miga äd sùzi tùtt a Mantva cl’è la partìda pù importanta äd l’an, tutt a drè al Pärma ca tòca a nojätor par prìmm drizär la baraca e Empoli l’è fondamentäle! Ancora na volta tut a Mantva, mo propria tut tut tut.

Crociato +63+

Le pagelle 2008/2009