Pavarèn sensa vòt: t’è risparmiè na lampada Pavaro, abrozadùra a màca, na paräda gnanca trop dificila e stop;

Zenòn  sèz: al solit Dino, padròn äd la so fascia ma sensa fär d’il còzi da ricordär;

Castlèn sèz: par ne fär tòrt a Dino anca Pavlèn partìda discreta sensa chisà che robi, ansi un gol magnè gròss c’me na cà a dirla tùtta Pavlèn;

Toast òt: à gh’äva paura parchè al Pisa a’l g’äva dù stopaj davanti e gh’èra cäld, inveci l’è stè semplicement parfèt, sensa gnànca al minim eròr!;

Paci sèt: na cuälca baläda in pù che Toast specialmente in-t-al prìmm temp, pr’al rest pòc lavor ma ben fat, e la solita vòja äd vènsor, ti a’m è d’avis che da Parma te’t movrè mäj pù;

Lucarèli Picèn sèt: l’è tornè al Toscanini ad la difèsa, na cuälca stèca l’è vèra, mo l’orchèsstra con lù la funsjon’na ecome, profesjonìssta inteligent e bòn d’zugär;

Mariga sinc: e si che la pantera nera col cäld africàn la g’äva da sintìrs’a cà sòvva invèci un mèz disàstor, l’è drè a tirär al fjè dopa un pär ed mès da fenomeno;  

Budel sèz: cäld o miga cäld chiù l’è c’me un Ciao, presa dirèta, na märcia e basta, un sartòr al ralentadòr;

Moròn sèz: dai dai Capitàn ca’g sämma, l’è städa dura mo ormäj ämma pasè al strisciòn äd l’ultom chilometro, e dardè a s’è fat al vöd, dai c’ag sämma;

Vantagè sèz: s’al stìss bèn a sarìss un cuàtor, ma dato c’al g’ha un znòcc mafò, suficient minim pr’al coràg d’afrontär na partìda in ch’il condisjòn lì ! Dai c’ag sämma Bulgaro che po’ te’t vè a fär metr’a pòsst;

Paloschi sèz: suficensa äd stima anca pr’al putèn, dòpa dù mès da ufo e gol pès c’me al piòmb, moment äd flesjòn, ma la vòja e l’impèggn j’en sempär al masim elòra basta col lì;

Leon dèz: tèssta lìsa s’at g’aviss äd la continuitä con i colp c’at gh’è, a’g n’in sarìss par nisòn ! Dù colp äd pnèl, da artìssta dabòn, par fär al vöd dardè, du pedalädi c’me fäva al Pirata in salìda ! Bravo !;

Lucarèli grand dèz: chi du secònd prima äd butär dentär la bala te’t ja si godù miga pòc sota la curva d’i tò amigh ah ? A paräva la trama d’un film, inveci l’era realtè ! La sanfäda d’al Re äd la forèssta, al moment giùsst l’è sempär mortäla;

Guidolin dèz: da zero a dieci, c’me al film äd Ligabue ! Mo ti Don al dèz par l’impresa a’n t’al tira via nisòn ! Du cambi decizìv, e preparasjòn parfèta ! Ancòrra na volta grazie Mister;

Tifòz dèz: dèz a tùtt, la nostra curva e la curva d’i Pisàn ! Còste chi l’è al stadio ca vrämma, ätor che divieti! Rivalitä, sfottò, si ma prim’äd tùtt spetacol colòr e divertiment insìmma ai spält, e dirìtt d’andär in qualsiasi stadio par tùtt ! E sàbot “Città...dell’A” la g’ha da èssor tùta Crozäda, mo stavolta a’n sarvìssa gnanca j’apèl !

AvAnti crociAti stiAmo tornAndo ! 

Crociato +63

Le pagelle 2008/2009