Pavarèn  òt: na gran paräda subìt par fär capir che con l’an növ l’ha lasè lì äd fär Babbo Nadäl, bravo sènnor parchè a’n t’è mäj molè!;

Zenòn sèt: sul gol ciapè te’t s’er scordè al freno a màn tirè, dòpa ‘na vòlta molè a’t si stè determinant a stär dòpi con Reginäld tant che la rimonta l’è partìda propria da c’la pärta lì!;

Castlèn sèt: un vòt in pù parchè a’t gh’èv al pù nojòz äd l’Empoli da c’la pärta lì e zugär a cuatòr jerdlà l’è tochè a tì stär pù mancè dardè e’t l’è fat sensa problema;

Paci òt: fin’al gòl un disastor, mo col gol lì a’l pol aver cambiè sträda a la stagiòn d’al Pärma;

Lucarèli òt: sul prìmm gol anca tì a’t s’èr ancòrra a pajòn, dòpa a rivèr in fònda parfèt, c’me a dig sempär un zugadòr äd n’ätra categoria;

Lunardèn sèt: dònca picèn, andämma ben bombè, però sa te’g la cäv a stär ancòrra un brizinèn pù trancuìll la pòl andär ancòrra mej parchè a’t sì drè a imparär a la velocitä äd la lùza;

Moròn òt: oh a’l Moròn äd l’an pasè, un diesel c’al continua a crèssor cuand ch’j ätor j’en drè a calär, tonic dimanic grintòz precis, t’è fat da Vinavil par novanta minùd da ver capitàn;

Mariga dèz: dònca watusso a’t si autorizè a mandärom à ... ! Da cuand’a t’ho dìt ca t’andäv bèn imsìmma a na pista d’atletica à t’è tirè fòra d’il zugädi da campiòn ätor che trimìla sèzi, s’at vè avanti acsì al perìcol l’è che a züggn i’t pòrton via subìt!;

Reginäld òt: bräv balarèn, acsì a’s fa, grènta vòja e stär adòss ai tarsèn, dai su ca provämma a imbrocär la sträda giùssta se Dio vòl;

Vantagè sèt: partìda anonima ma un vòt in pù parchè cuand l’ha capì ca n’èra miga sìra a’l s’è sacrifichi par la scuädra, bravo Bulgaro;

Paloschi dèz: mì còj che cuand’i fan gol i fan j’orècci, coj chi päron rabì, còj ca fa polemica a’n ja capìss miga; la còza pù bèla cuànd a’s fa gòl l’è n’esplosjòn äd gioia e na corsa sòta a la tò Curva! Semplicìsim no? A’v l’ha da insgnär un ragas äd dezdòt an?;

Guidolin dèz: Don, c’me a’t piäsa a tì pochi paroli e tant fàt! Ansi na parola e basta! Parfèt!;

Tifòs dèz: tarzènt äd venerdì sira l’è un bèl nùmor, tgnèma dura ragas cl’è lìora äd dir dabòn anca nojätor, tutt’insèmol;

Berta e al sito d’al Pärma sòta zero:  sior Berta, a n’è miga la prìmma volta c’as comporta acsì, sèrt comportament l’an pasè i s’en costè cär bombè, mo prim’äd tùtt i’n n’en miga comportament in linea con la tradisjòn äd Pärma, dato che la stima reciproca l’è sota tèra, a’n sarìss miga ora äd sligär l’äson??? Al sito d’al Pärma po’ c’al ne publica miga la notisja äd la squalifica…par piasèr, a pära la censura d’i temp äd la Pravda, co v’è d’avìs äd figurär bèn? Propria sòta zèro al vòt!

Crociato +63

Le pagelle 2008/2009