Pavarèn cuàtor: dit e fat a’t ciamarò manganòn tuta la vita, a ne’t tèn strìcc na bala che vùna che lavòr mama mia ! Boh mi a’n so miga parchè Bucci no e chilù sì !;

Zenoni dù: na tragèdia, mòl c’me na pàna còta, imbranè c’me n’òca, in t’la Primavera gh’èl miga un tarsèn dèstor basta ca sia ? Tant mej che chilù !;

Castlèn sèz: al meno pèz äd tùtt, almeno l’ha mìss un cuälc cross ben fàt, ma il pönti i s’èron scomsumädi tròp con l’Ancona;

Paci zèro: a’t gh’è na corsa da dolce Euchessina, fat spiegär dai tò vècc co vol dir, stènc c’me un tòcc äd lèggn, à’t pär propri incioldè ! improponibil;

Lucarèli cuàtor: a’l continua a’n fär miga d’il gran figuri ma zugär a tàca a cl’ätor pilolòn lì l’è un problema miga di ridär;

Moròn sèz: c’me al solit l’è col dal contachilometri pù frùst äd tùt, ma stasira gnent’ätor che la corsa;

Budel sìnc: a ne’s vèda praticament mäj, ma in mèza al camp a gh’è da fèros vedär eccome, i dìson cl’è ordinè, ah sì a’l sbalja pòch parchè a’n n’in ciàpa pochi tut lì;

Leon zèro: da dèz a zèro, a t’è fat a l’arvèrsa äd Ligabue, narvòs, lent, tacabriga, oh lòmo, mäj pù d’acordì ???;

Paloschi sìnc: mol anca lù, dù ocasiòn da fär in t’al prìmm temp, ad ogni modo l’è un zugadòr da tirär mäj mäj zò;

Lucarèli cuätor: oh lòmo sit bele tornè col äd l’an pasè ? No ah ? Stasìra a paräva infìn ca t’avìss mìss su un cuälc ètto, a’t n’è miga imbrochèda vùna che vùna;

Reginald zèro: a te’m mètt in imbaràs, parchè un po’ che in serie B a’m tòca fèr na pagèla ogni trì par dù, e sòra al cònt ormäj a’n so pù co dìrot, parchè a’t j’ho bèle dìti tùti e a sòn rivè in fond’al cavàgn ! Vèda tì, mì cambiarìss propria mestèr, la Ely la ne’t catà miga da fèr cuèl in tivù ???;

Matteini zèro: chilù a’l tira i s’ciàff a l’orba, a’l vèn su invèci che sarcär äd spacär al mond al pär c’al zùga par piasèr, mòl c’me un lumagòn, a pära c’al la faga aposta ! E catèr l’ùss a la prìma ocasiòn ?;

Cagni cuator: Gigèn n’è miga sempär domenica, o mèj sàbot, cuàtor pònti cuand a s’è spompè in t’il gamba e in t’la tèsta i’n pòlon miga zugär, e po’ al ragasèn a ne’s tira mäj zò, a ne’t dirè miga che a dezdòt’an l’è stùf parchè l’ha zughè sabot no? Dai là Gigèn un po’ pù d’elasticitè par piazèr ah? E tàca a där d’il strènghi a chi ja merita sionò a’t fè la fèn äd còj äd l’an pasè;

Public sèntdèz: pù o meno cme i tifòz che al martedì a sèz e trì j’en rivè a Bergamo a vèdär col scandal lì ! Bravi, compliment a vojätor serta gènta la ne’v merita miga dato chi n’en gnanca gnù a salutär bela forsa gnìr sota la Curva cuand a’s vènsa e basta eh ! Tachèma a ciapär la pïga äd l’an pasè?  

Crociato +63+

Le pagelle 2008/2009