SJÓPOR

Come annunciato la settimana scorsa, Crociato '63, per manifestare contro l'inconcepibile decisione degli organi di sicurezza di vietare ai sostenitori Crociati la trasferta di Modena, questa settimana sciopera.

Niente pagelle, quindi. Soltanto una bella intervista, a sorpresa, da lui rilasciata al giornalista-tifoso della Gazzetta di Parma, Sandro Piovani, e supervisionata, come sempre dal leggendario cultore del nostro vernacolo Enrico Maletti di Parmaindialetto. Quando si dice il gioco di squadra ...

Eccone il testo.

Piovani: Crozé, i t’ han pròprja fat rabìr ... Ela ‘na proibisjón acsì gròsa a ‘n podär mìga andär al stàdio?

Crociato 63: Gh’ é mäl äd rabìr chi m'han fàt, l'é ‘na proibisjón insensäda, l’ arduzìssa la libartè äd la génta, in-t-na paròla l'é anticostitusionäla ! Basta e avànsa par fär rabìr la gènta ! E n'ätra còza ch' la da fastìddi e bombén, l'é che ch'la légia chi la pär fàta p’r il citè picén'ni e basta, dù péz e dò m'zùri cme al sòlit, dòpa col ch'é sucés al dezdòt äd màgg’, a n'é stè tòt gnànca un provedimént contra l'inter, né contra i trimìla sciochètt ch’ à fat invazjón äd camp, e ch’ i 'n stàgon miga a dìr ch' à ‘n gh'éra miga äd próvi o d'imagini televizìvi ah ? E nisón a 'n s'é gnànca tòt la briga äd där ‘na spiegasjón, nisón a gh’ à armìss la poltrón'na, ‘na vargòggna ! L'unica còza ch' j én bón äd fär l'é vietär dil trasfèrti al scuädri picén'ni ! n'é mìga sìggn äd fòrsa, l'é sìggn äd deblèssa.

Piovani: J ultras a tùtt il manéri i sén fat sintìr... e civilmént... Cò spól fär p’r evitär ch’ il proibisjón chì?

Crociato 63: J ultras ancòrra ‘na vòlta, j han dimostrè d'ésor la pärta pù sana dal calcio ätor che bali ! J én còj ch' a gh’ mètta pasjón, témp, sòld par l'amòr ädla maja e basta, e jérdla sóra al cónt, a 'm rizùlta ch' a gh’ fùss parècc’ pramzàn anca miga tifóz d'al Pärma al Braglia ( naturalmént a 'n pärli miga di giornalìssta ch' j én li par lavorär ) i sòlit ch’ a càta la manéra d'infiläros dapartùtt ! Cme a ‘s dìz ? “oltre al danno la beffa” p’r ì tifóz dabón ! P’r evitär la poibisjón, a gh'é da fär ‘na còza e basta, lasär lì äd proibìr il còzi, anca parchè j han fat un sàch äd légi nóvi, un sàch äd restrisjón biliètt nominatìv, “tornellimarcondirondirondelli” e pò i viéton il trasfèrti ? Ah njént da dìr, l'é tùta génta con ilj idéi cèri un bél pò còla ch’ la 's dovrìss govarnär e garantìr la sicuréssa ! Mama mia !

Piovani: Anca a l'andäda j ävon vieté al stadio ai modnés... Mo il pagéli a t’ j äv fati listés... Parché?

Crociato 63: mah, sinceramént a m’ arcòrd miga dzèmma che al siòper ch'l a vòlta lì al l'arà fàt còl ch’ a scrìva il pagéli in djalètt modnéz insìmma a la gazètta äd Mòdna.

Piovani: A ‘n vrìss mìga ésor malisjóz mo l’é miga ch’ i ‘s vólon fär vèddor il partidi in televisjón???

Crociato 63: Bé sicuramént l'é acsì, e fìn tant che in itàlja a gh'é cuaranta miljón äd nàdor ch’ a tifa par ch' il cuàtor scuädri e ch' i gh’ dàn da bévor tùtt da bòtta l'andrà sémpor acsì ! D'ätra pärta cuànd a ‘s pärla äd televizjón j'én tùtt d' acòrdi, déstra, sinìsstra, céntor, tarallucci e vino e via andär.

Piovani: In tùtt il manéri ch’ i arìsot promòs in-t-la partida col Mòdna?

Crociato 63: Stà mìga sarchär äd fregärom Sandro hehehe a són in siòpor äd zugadór a 'n pärli mìga!
Promòss i tifóz che anca con la ràbja j én stè a cà sénsa sarcär di privilég’, bocè còj che con di lavór a l'italjàna j én andè a Mòdna listés, a n’ è 's fa miga acsi, a 's gioìssa tùtt insèmma e a 's patìssa tùtt insèmma.

Piovani: Col Trevìz a ‘n gh é miga äd proibisjón. Dónca a tórna il pagéli, giùssti?

Crociato 63: Si lundì ch’ vén a tornèmma a scrìvvor ‘na cuälca stupidäda sa n’ é gh’ sarà mìga un cuälch furbación ch' a ‘s proibìssa anca la curva nord.....a 't zè cme l'é.........la mädra d'i ***** ì dìzon ch’ l'é sémp’r incinta.

Piovani: Mi, a dir la vritè, un po' l'Oservatòri al vój ringrasjär parché al m’ à consentì äd scrìvor in djalètt insìmma ala me gazètta äd Pärma... äd Pärma dabón...

Le pagelle 2008/2009