Luca dèz: par Luca l’è un vot a la cariera, a la parson’na, st’an äd sicur a’l n’è miga stè al mjòr tecnicament, ma äd sicur a’l n’è miga stè al prìmm responsabil äd col cl’è sucès, ansi;

Pavarèn sèz: ält e bàs, in t’al complès suficient e - da còl ca pära -un bräv ragas ! La serie B la’n dorvìss miga ìssor un problema elòra … a’l confermi mì !;

Zenòn zèro: l’unica còza bon’na ca t’è fat l’è stè därm’al spönt pr’al stranòm pù indvinè äd l’an ! Mò a’l sèt che in curva i’t ciàmon tùtt Dino mo a’t pär Dino da bòn ! Sèt ca sarìss bèl sa’t l’incontrìss … c’at ghè strichìss la màn che tant lù a’l ne vèda l’ora ! Pr’al rèsst lasämma perdor cl’èmmej;

Col’ly dù: un po’ mej che Dino, mo da chi a dir cl’è andè bèn a’g n’in pàsa ! vùnna bon’na e trì sbagliädi, lent, narvòz, tacabriga al moment sbaljè, par forton’na ca gh’è scadù al contràt !;

Castlén vòn: l’èra zèro ma gh’è un me amigh c’al m’ha dìt c’an dagh mäj un vòn elòra par Pavlén ecco un vòn ! Ernia al dìssc, znòcc trìd, cervicäla ?? Co gh’èvot Pavlén st’an c’at paräv GiucasCasella insìmma ai bräz quand’at coräv ? Fat där na registräda insìmma al banc, s’at völ a’t mandi da Tilio, al me amigh carozèr/mister che intant a’l te da anca un cuälc consìlj tècnic;

Nando cuator: n’eròr fondamentäl Nando, a’n t’è miga capì al moment äd lasär lì ! Adèsa a t’al digh mì, l’è ora l’è ora, e tut somè, bon’na fortòn’na … parchè a Pärma al sìggn a te’g l’è lasè !;

Falcò zèro: sensa cativèria, mò in serie A du pè acsì tort a’n j’äva mäj vìsst, forsi forsi Garito in serie C in t’al stant’òt stantanòv a’l g’äva dù pè pèz che i tòvv ! Cò pòsja dìr, a’t sarè anca un bòn ragas par l’amor d’al Sgnòr, mo a balòn d’ogni tant la bala la vòl stopäda sionò l’è nòta;

Paci cuator: l’èra da sèz, anca da sèt, mo con c’la ca … voläda äd Reggio Calabria l’ha stachè al bigliètt par l’infèron ! Imperdonabil, incredibil ! Però in serie B al podrìss ìssor un bòn zugadör;

Rossi sèz: s’avìs decìz mi, l’arìs zughè tutt’il fèsti, almeno l’è giòvon e pramzàn, parchè d’il stupidädi a valanga in n’han fat anca i vècc e forestèr dònca almeno chilù al gh’èva pù dirìtt äd zugär, ma val a savèr ti c’me la funsionäva coj senatòr e i deputè in còl spogliatoio lì !;

Cigarèn zèro: nuovo Pirlo ded chi, nuovo Rivera del là, l’ha zughè na partìda e basta decenta, con la Reggina a l’andäda, pò a’s vèda c’al gh’èva paura äd färos la bibi povrinèn, sempr’in pònta äd forsèn’na, parola d’ordine därol via imediatament, prima che un cualchidòn a’s n’intaja e po’ la serie B pr’il sioren’ni la’n va miga bèn brìza;

Dessena sinc: al rendiment l’è stè da trì, però l’è du an cl’è incantonè ins’mma a c’la fascia là c’al ne gh’èntra propria gnènta, boh, a’s vèdda che tutt’j alenadòr j’al vèdon li e basta ! Però al conträri äd Cigarèn n’àn ad serie B a Daniele a’g dovrìss fär bèn da bòn parchè lè un zugadòr äd corsa, äd grènta äd carator! Dai la Daniele, adèsa toca a ti par prìm arportär la tò citè in do la g’ha da stär;

Gasbarò zèro: na parola ? Ridicol, e zontämma pur prepotent, isteric, arogant e in camp ? Inconcludent, ridicol, mäj decisiv, n’anäda strepitosa ah Dante ( par chi n’al savìss miga Dante c’me Bertoneri, che però al g’ha avù la decènsa äd sparìr dopa dù mès ) sperämma con tutt’al cör c’at sparìss e ca te’t fag pù vèdor con la crozäda adòss;

Mariga sèz: un vot in prospetìva, na cuälca còza bon’na, mo dù espulsiòn da cojòn, cognisiòn propria inesistènta, pr’adèsa na gran corsa e du pè discrèt, d’ätra pärta vòt c’al ne sia miga bòn :ad còrror vòn ca vèn dal Kenia ? Adèsa pr’al rèst a g’ha da pensärogh j’alenadòr;

Morfeo zèro: complimenti, n’ezèmpi äd profesionalitä, d’atacamènt à la citè, si parchè l’è l’unica citè d’Italia ormäi in dò ì ne’t còrron miga drè … sperèma ca ne’g sia miga nisòn c’ag vèna in menta äd rinovärot al contrat, c’at sparìss ded chi, al pù lontan posibil, a organizär la pròsima comuniòn, o la crèzma o un batèzz, basta ca te’t fag pù vedär; 

Moròn dèz: Stefano co dir ! Na gran parson’na, un grandisim professionista, n’Om con la O maiuscola, anca se la serie B par ti, par ti e basta l’è n’ofèsa, a spèr con tutt’al cör c’at resti chi, con la crozäda adòss e la fascia da capitàn stampäda insìmma al tò bras, par cancelèr chi lagormòn dai tò e dai nostr’òcc ! Esempi par TUTT;

Parravicini sensa vòt: a’n so miga co dir, i’l l’han tgnù in naftalina par n’an intrègh, chi tòcc äd partìda cl’ha zughè l’ha dimostrè d’ìssor miga pèz che ch’j ätor, a’n so miga che vot därogh parchè la so esclusiòn par tut l’an l’è un mistèro;

Pisanu sèz: l’è partì c’me na s’cioptäda, po’ l’ha tirè al freno, e po’ a’l s’è fat mäl ! A’n so miga sl’è par chè a’l s’è fat mäl mo da col momenti lì, a sèma dè zò c’me i birìll d’al bowling ! An ragas tachè a Pärma da bòn, ca sarìss un bel lavor c’al restìss anca in B

Budan sèz: bèn o mäl sèt gol a’l j’ha fàt, mo l’è propria c’me na botèga äd cristàl, sempär ròtt e äd pòca rèza in confront al prèzi ! Purtrop la so pèca l’è al fìzich miga la tecnica, ad ogni modo mi al vendarìss, dato cl’ha fat savèr subìtt cl’andrìss anca via, dì c’as vaga a färos mäl da n’ätra pèrta;

Corradi sèz: a’l giròn d’andäda l’ha fat al sò, dòpa l’è st’è mìss in t’un cantòn c’me n’fèr vècc, almeno l’è sempr’andè drè a la scuädra sensa tirar a man d’il comuniòn e d’i matrimòni c’me un cualchidòn ätor bagolòn;

Lucarèli dù: l’è rivè c’ag baläva tùtt sòta la majèta, dòpa cuàtor mèz a’g bala ancòra tùtt, a’n pòs miga crèdor che in cuàtor mèz vòn à ne’g la cäva a enträr un po’ in forma ! Comprè e paghè c’me na näva da guèra, l’ha dè al rendiment d’un pedalò ! Compliment a lù e chi furbaciòn ca l’ha comprè;

Reginald zèro: cuant a’g n’ho dìtt in trentòt pagèli, e tùti meritädi ! A’l gèni äd la lampada, saltimbanch, pìstapòci, balarèn da merengue, balord, e  balord l’è dir poch ! Al fat che anca còste chi l’è n’ätor lavor da vòlpi äd chil’ha portè in sà e äd chi a’l g’ha fat sìnc an äd contrat ! adèsa a’l se resta in cà fin tant c’al fa l’azèj;

Dicarlo zèro: un fenòmen ! Taticament, umanament e c’me preparadòr atletic ! N’ätor acuìsst imbrochè al sènt par sènt, gnent da dìr st’an i sold j’en stè propria spèz tùtt in t’la manèra giùssta mama mia! E sòra al cont a’l g’ha anca avù al coràg äd dìr a do fèsti da la fèn che s’al tornäva indrè a’l Pärma a’l l’arìss salvè lù ! Na tragèdia !;

Cuper zèro: a dir la vritè l’ha fat meno pònt äd mèdia che Dicarlo, c’an n’era miga facil, dzämma che al miracol sta volta a’l n’è miga rivè! Anca lù l’ha pers la tèsta, a’s vèda che a Parma l’è pasè un virus tut particolär st’an;

Ghiro zèro: Ghiro a’m dispiäz a’t g’arè anca mìss tuta la bon’na vlontä d’al mond, al risultät l’è ca te’g l’è caväda in do gnanca Bondi sensa gnanca un bòr a’g l’äva caväda, cioè a retrocèdär ! Elòra gh’èra bisògn äd cazär via tùtt i pramzan e i parsonàg c’ha fat la storia dal Pärma par mètor dentòr d’il ciopädi äd Brescian se i risultät j’en stè costi chi ? Gh’èra bisogn äd fär la vòza gròsa coj gròs che  po’ i’s l’han fata pagär subìt ? Il prìmmi cualitä in col mond chi, j’en umiltè, sensibilitè con l’ambient, e furbìsia, st’an a’s n’è vìssta gnanca vùnna, sperèma che dagl’j eròr a’s pòsa imparär ! e in conferenza stampa, par piazèr, sta miga a dir Io dozènt volti, che al Pärma a ne’t si miga ti e basta ... al Pärma a’t l’ho bèle dìt, l’è c’me un PEEP, anca sa’t l’è paghè, l’è sempär di tifòz e äd la citè par prìm ! E col ca t’ho apen’na dìt l’è dit sensa al minim rancòr mo con l’afèt d’un fradèl pù grand ( purtrop ) e d’un inamorè a’d la maja crozäda, mo inamorè da bòn c’al farà l’abonament dopa sinc minud ca’g sarà la campagna avèrta;

Tifòz sensa vòt: tropi còzi brùti, na tragèdia, tanti pagini nìgri , par där un vòt ! L’unica còza, adèsa pù che prìmma, in t’al ricord äd Matteo tgnèma dùr e corämma tùtt a fär l’abonament a la nostra crozäda c’me dìz la cansòn “cambieranno i giocatori cambierà l’allenator ma i crociati saran sempre nel mio cuor” ! Adèsa pù che mäj AVANTI CROCIATI ca gh’è anca un sac äd trasferti c’am casca bèle la gòza st’an cuèl !

Crociato +63+ 

Le pagelle 2007/2008