Partìmma col dir che fär stì pagèli l’è na tortura, parchè sarcär äd dir d’il còzi spiritòzi in col moment chi, a’s pòl imaginär ...

Pavarén sèt: con na cuälca paräda l’ha salvè al salvabil, anca lù mäj aiutè da na difèza inguardabila;

Col’ly zèro: inguardàbil, imprezentàbil, balord, sarìss mèj ca ne’s prezentiss gnanca a ritirär al stipèndi;

Paci sinc: fin c’an gh’èra miga al sìngor anca anca, dòpa adio, l’è andà in t’la sòvva anca lù;

Nando zero: l’è ora äd sarär su botèga al me ragas, anca parchè ormäj invèci che där via c’me na volta ane’t fè che buscär;

Castlèn zèro: da la so pärta corsia telepass, i gnèvon zò ai dozènt a l’or, c’me tut l’an d’ätra pärta;

Parravicini sèz: na partìda discreta, se non ätor la vlontä c’la’n s’è m vìssta st’an in camp;

Moròn dèz: l’unic che anca jèr l’ha lotè fin’al novantèzim, e l’unic c’al g’ha avù al coràg äd gnìr sòta la Nord a ciapär la so dòse d’aplausi, coj lagormòn c’me nojätor dardè la ramäda! Un capitàn da razòn par vistìr la Crozäda, sperèmma che col cl’ha dìt a sia vèra, Stefano ancòra con nojätor st’an cuèl;

Cigarèn zèro: l’obietìv l’è stè ragiunt, il gambèn’ni j’en sälvi par st’an cuèl ah! A’t l’auguri ca t’abia pinsè acsì, parchè se invèci coste chi l’è al tò livel, äd carièra a’t n’in farè ben poca nani;

Gasbarò zèro: penòs, inesistent, ridicol! A vedär sèrta genta zugär in serie A, l’è na tragedia, con la crozäda adòss ancòrr’äd pù. Mi a n’al vòj pù vèdor al Tardini;

Reginald zèro: èl un zugadör äd balòn chilù o un saltimbanc? Al dubi a’g l’ho sempär avù, adèsa fnì al campionè l’è ‘na certèssa, la zgònda … e l’accendiamo;

Budan cuator: la partìda ca sarvìva un cuèl äd pù, l’ha dè un cuèl äd meno, chilù a’l sarà al prìmm c’al va via, e tut somè vòn ca pära la vedrèn’na äd Pasalàcua al pòl anca andär;

Manzo sèz: fin c’ha tgnù il gambi la partìda l’è städa ben preparäda, certamente gnanca ‘na colpa a’g mancarìss ätor;

Prefèt e Cuestòr zèro: compliment esòrdi coj barbìz, da la padèla aj bräz, e n’èra miga facil fèr pèz che coj äd prìmma! S’ani bèle mandè d’la genta äd serie B anca lì?? Adèsa i mè  siòr, a voj vèdor mìla difìdi, tutt coj c’ha fat invaziòn i van difidè, esissta na lègia fìla rispetär dato ca gh’era mìla telecambri, fì al vostär dovèr, e vargògna ancòrra par col ca s’è vìsst jèr! Bocè anca vojätor dù, sensa apèl!!!;

Tifòz òt: un bel stadio, mo anca jèr a’s podäva där cuèl äd pù, tùtt cuànt! A sèma stè contagè un po’ trop da c’la manga äd genta indegna äd vistìr la nostra Maja;

Ad ogni modo al prìmm giòron d’abonament, mi a sarò bèle li a färol, e vòj vèdor tutt i pramzàn ch’j èron jer al stadio fär ätartant.

Crociato +63+ 

Le pagelle 2007/2008