Luca sincov: Luca Luca te’g n’è mìss d’al tò jér sìra ah? Dai sincov parché a’t si tì se no s’a gh’èra Santa Luzìa l’èra un bèl zero sècch;

Zenoni du: còz’èl ancòrra sénsa transfer ànca chilù? No parchè l’è cme sa’l ne zughìss gnanca;

Nando séz: gnanca n’èror; con c’la ghigna da Legge Basaglia lì a’g n’è ancòra abàsta par fär stär schìss tùtt;

Falcò tri: va bèn c’al s’arcordrà d’al sparègg äd Bologna mo a’g va dìt che adésa al zuga col Pärma e al balòn a’l vòl pasä ai Crozè na quälca volta...;

Castlè du: Pavlèn a’t parèv al fjôl äd Geppetto jér sìra do gambi d’lègn da vendor a l’Ikea e rigor tirè da nador;

Dessena sincov: a’t si miga podù andär a la Cròza äd Colècc alòra te’t si sfoghè col barsàj d’al portèr; mò al zôgh chi l’èra al conträri i’t arìson premiè sa’n t’al avìs miga centré al portèr eh che eror Daniele;

Cigarè séz: un gran pasàg sul gol, ordinè forsi fin tròp d’il volti al pèr ‘na balarén’na invési chi a’g vol di camionista;

Morrone séz: combatent, grénta dzèma che la pagnòta chilù la’s la guadagna tutt’il fésti mo ‘na briza in pù äd qualitè la’n darìss miga fastìddi;

Pisanu tri: sit zà tornè in t’la tòvva nani ? Un pistamènt äd pòcci tra chilù e cl’ätor brasiliàn ca t’al dig mì; al protòtip d’al niént;

Mimmomorfeo séz: miga äd pù incò, parchè la zugäda la t’è restäda in sacòsa però quand’at vè su ch’j ätor i fan déz mètr’indrè subìt! Mimmo cl’ätor vèt avanti n’ätor pò a tgnirol zò quand’al sta bèn?;

Reginaldo tri: al socio äd cl’ätor a pistär d’il pòcci; wè merengue che a zugär al balòn a’s vénsa a butär al balòn in mèza a chi tri päl bianc là in fònda, c’la cosa strana c’as ciàma porta; capì???

Corradi dèz: Barnardò bentornè!!! Na partìda coj barbìz da un profesionista coj barbìz: fòrsi miga un fenomeno mo vòn c’al spùda sàngov dal prìmm à l’ùltom minud! Vòn che la Crozäda a’l la pol portär anca a dormir;

Mimmodicarlo sìncov: Mimmo alòra??? Alòra??? In serie A la diferénsa l’è fata dai particolär, da un pär d’episodi a partìda! A gh’è da lavorär insìma a còj lì e sbagliär niént! E pò a dirla tùtta fin’in fonda... èla tùtta faren’na d’al to sach, Mimmo, col schema lì??? Mah;

Tifos sèz: na prestasiòn apen’na apen’na suficenta, l’ùmmid a’l s’è fat sintìr a’s pòl dir na Curva con la cervicäla c’la s’è fata sintìr. Rimandè tutt’in ciòp vamolà, zugador, societè, tifos tutt’in ritir stè gir!!!

Crociato +63+

Le pagelle 2007/2008